Një konflikt mes dy shqiptarëve ka përfunduar tragjikisht pasditen e së enjtes në qytetin italian të Pratos, ku një burrë rreth 35 vjeç humbi jetën pasi u godit me thikë në bark.
Ngjarja ndodhi në zonën mes Chiesa Nuova dhe Galceti, pranë rrugës Baracca. Sipas hetimeve paraprake, viktima u rrethua nga disa bashkatdhetarë dhe u godit në një moment tensioni, duke u lënë i shtrirë në rrugë.
Ekipet mjekësore mbërritën menjëherë dhe e transportuan të plagosurin drejt spitalit, por ai ndërroi jetë pak minuta më vonë për shkak të plagëve të rënda.
Viktima nuk kishte dokumente identifikimi me vete, çka ka vonuar zyrtarisht konfirmimin e identitetit të tij.
Në vendngjarje u gjet edhe një tjetër person i plagosur, një i ri 21-vjeçar me origjinë shqiptare, i cili dyshohet se u përfshi teksa përpiqej të ndihmonte viktimën gjatë sulmit.
Ai është dërguar në spital dhe ndodhet jashtë rrezikut për jetën.
Prokuroria e Pratos, nën drejtimin e prokurorit Luca Tescaroli, ka nisur hetimet për vrasje të qëllimshme dhe ka vendosur në ndjekje dy persona si të dyshuar.
Autori kryesor i sulmit mbetet ende në arrati dhe është shpallur në kërkim, ndërsa arma e krimit, një thikë nuk është gjetur deri më tani.
Pamjet nga kamerat e sigurisë të zonës po analizohen dhe po mblidhen dëshmi për të hedhur dritë mbi rrethanat dhe motivin e ngjarjes, i cili për momentin mbetet i paqartë.
