Një ngjarje e rëndë ka tronditur komunitetin në Dafnes të Heraklionit, Greqi, ku një shtetas shqiptar, rreth 55 vjeç, është gjetur i pajetë brenda një rezervuari me ujëra të zeza.
Sipas njoftimeve nga autoritetet greke, viktima ishte shpallur i zhdukur që në orët e para të mëngjesit, duke shkaktuar shqetësim të madh tek familjarët dhe banorët e zonës. Menjëherë pas denoncimit, ekipet e shpëtimit u angazhuan në kërkime intensive në zonë.
Dyshimet se ai mund të ishte rrëzuar në rezervuar çuan në ndërhyrjen e zjarrfikësve dhe ekipeve të emergjencës. Pas një operacioni pompimi, trupi i pajetë i 55-vjeçarit u gjet dhe u nxor nga rezervuari.
Hetimet për zbardhjen e plotë të rrethanave të vdekjes janë në vijim. Autoritetet greke po shqyrtojnë të gjitha pistat e mundshme, përfshirë aksidentin, vetëvrasjen apo një veprim të qëllimshëm kriminal.
