Një ngjarje e rëndë ka ndodhur mesditën e sotme në Baltëz të Fierit, ku një efektiv policie ka mbetur i vrarë. Sipas informacioneve paraprake bëhet me dije se viktima është Novruz Cenalia, efektiv i Shqiponjave, 28 vjeç. Ndërkohë burime bëjnë me dije se efektivi i cili ka qenë jashtë shërbimit, por i veshur me uniformë është përfshirë në një sherr të momentit. Policia ndodhet në vendngjarje dhe po heton mbi ngjarjen e rëndë.
Fier/Informacion paraprak
Rreth orës 13:15, në fshatin Baltëz, dyshohet se gjatë një konflikti të çastit, shtetasi A. M. ka vrarë me armë zjarri shtetasin N. C., punonjës policie i Forcës së Posaçme “Shqiponja” të DVP Fier, jashtë shërbimi, por i veshur me uniformën e Policisë, pasi shkonte për të marrë shërbimin.
Menjëherë në vendngjarje janë nisur shërbimet e Policisë, Forca Kombëtare e Sigurisë, Reparti Special “RENEA”, të cilat kanë rrethuar zonën dhe vijojnë punën për kapjen e autorit.
Grupi hetimor dhe drejtues të Departamentit të Policisë Kriminale, në drejtimin e Prokurorisë, po punojnë për sqarimin e rrethanave dhe për dokumentimin ligjor të kësaj ngjarjeje.
