Një krim i rëndë familjar ka tronditur fshatin Frashër të Fierit, ku një 26-vjeçare dyshohet se ka mbytur të atin dhe ka inskenuar ngjarjen si aksidentale.
Sipas Policisë së Fierit, ngjarja ndodhi mbrëmjen e 23 korrikut 2025, rreth orës 23:00, kur Emanilda Rama njoftoi autoritetet se babai i saj, Anesti Rama, 56 vjeç, kishte humbur jetën në mënyrë aksidentale në banesë.
Fillimisht e trajtuar si një vdekje e natyrshme, ngjarja mori tjetër drejtim pas dyshimeve të para të hetuesve, të cilët vunë re mospërputhje të shumta në dëshmitë e vajzës.
Hetimet e thelluara zbuluan se e reja e kishte vrarë të atin duke e mbytur me një tel, për arsye që janë ende në proces verifikimi.
Burime nga grupi hetimor bëjnë me dije se pas krimit, vajza ka kërkuar ndihmën e nënës së saj, 53-vjeçares V. R., për të pastruar gjurmët dhe për të paraqitur ngjarjen si një aksident.
Emanilda Rama është vënë në pranga nën akuzën e “vrasjes”, ndërsa e ëma është shoqëruar në ambientet e Policisë për të sqaruar rolin e saj në manipulimin e ngjarjes.
Nga dëshmia e 26-vjeçares është mësuar se i ati e ushtronte një presion të madh, duke e kufizuar në mënyrën e veshjes dhe në kohën e argëtimit, duke e trajtuar me fanatizëm dhe duke kontrolluar ashpër jetën e saj të përditshme. Këto tensione familjare duket se kanë qenë shkak i konfliktit që çoi në këtë akt tragjik.
