Një ngjarje e rëndë është regjistruar mëngjesin e sotëm, në lagjen “Sheq i Madh” në Fier.
Një efektiv policie është futur me makinë në oborrin e një qytetari, pasi ishte në gjendje të dehur.
Gjithashtu ai është konfliktuar me pronarin e shtëpisë, duke e plagosur me pistoletë.
Për fat të mirë, pronari është jashtë rrezikut për jetën.
SHÇBA ka shoqëruar në Drejtorinë e Policisë së Fierit shtetasin P.Sh., ndërsa ka nisur hetimet proceduriale dhe hetimore për zbardhjen e plotë të ngjarjes.
“Në orët e para të mëngjesit të sotëm, shtetasi P. Sh, 41 vjeç, banues në Tiranë, me detyrë punonjës policie në repartin e FNSH Fier, duke drejtuar në gjendje të dehur automjetin tip ‘Benz’, në lagjen ‘Sheq i Madh’, ka humbur kontrollin, ka dalë nga rruga dhe është futur në oborrin e banesës së shtetasit S.M., 70 vjeç. Pasi është konfliktuar me pronarin e shtëpisë, ka nxjerrë armën dhe e ka plagosur në gishtin e dorës shtetasin S.M, i cili është jashtë rrezikut për jetën. Është shoqëruar në Drejtorinë Vendore të Policisë Fier shtetasi P.Sh. dhe po kryhen nga SHÇBA veprimet procedurale dhe hetimore për zbardhjen e plotë të ngjarjes”, njofton policia.
