Një ngjarje e rëndë ka ndodhur ditën e sotme në qytetin e Vlorës në lagjen “Lef Sallata”. Një banesë është përfshirë nga flakët rreth orës 17:45 gjatë pasdites, dhe si pasojë ka humbur jetën shtetasja me iniciale E.Gj. 50 vjeçe, e cila ishte me aftësi të kufizuara. Ajo nuk ka mundur të dalë nga banesa që ishte duke marrë flakë dhe për pasojë ka ndërruar jetë. Në vendngjarje ndodhet grupi hetimor dhe nën drejtimin e Prokurorisë po punon për zbulimin e shkaqeve të rënies së zjarrit.
Ndërkohë, syri.net ka publikuar disa pamje ku shihet se në banesën që ka marrë flakë kanë mbërritur forcat zjarrëfikëse që po punojnë për shuarjen e flakëve. Gjithashtu mësohet se gruaja që humbi jetën jetonte vetëm prej një kohe të gjatë në banesë, ndërsa nuk dihen ende shkaqet e rënies së zjarrit.
Njoftimi i plotë i Policisë së Shtetit:
Informacion paraprak
Më datë 23.03.2021, rreth orës 17:45, në lagjen Vlorë, ka rënë zjarr në një banesë ku jetonte shtetasja E. Gj., rreth 50 vjeçe, invalide, e cila nuk ka mundur të dalë nga banesa dhe për pasojë ka ndërruar jetë.
Grupi hetimor ndodhet në vendngjarje dhe nën drejtimin e Prokurorisë vijon puna për përcaktimin e shkakut të rënies së zjarrit.
