Në bilancin e 24 orëve të fundit që ka publikuar Ministria e Shëndetësisë, fatkeqësisht betejën me virusin e rrezikshëm e ka humbur edhe një 26-vjeçare.
Pas infektimit me koronavirus e reja është shtruar në Spitalin Infektiv në Tiranë , por pavarësisht përpjekjeve të mjekëve ajo nuk ka arritur ta fitojë betejën me virusin. Sipas të dhënave nga Ministria e Shëndetësisë e reja që ka ndërruar jetë është nga Tirana.
“Me gjithë përpjekjet e mjekëve, në 24 orët e fundit nuk e kanë fituar betejën me COVID19, 7 qytetarë: 4 qytetarë nga Tirana të moshave 26-78 vjeç, 1 qytetar nga Durrësi 53 vjeç, 1 qytetar nga Berati 81 vjeç dhe 1 qytetar nga Vlora 86 vjeç. Ministria e Shëndetësisë dhe Mbrojtjes Sociale u shpreh ngushëllimet familjarëve”, njoftoi Ministria.
Kujtojmë se disa javë më parë ndërroi jetë nga virusi i rrezikshëm edhe një 34-vjeçare e cila ishte katër muajshe shtatzënë.
Fatkeqësisht një ditë më pas ndërroi jetë edhe 24-vjeçarja që ishte për kurim në Turqi , Xheni Kabo. Mjekët u detyruan që të ndërprisnin shtatzëninë dhe sollën në jetë foshnjën në javën e 31. Për shkak të gjendjes së saj të përkeqësuar, ajo ishte dërguar në Turqi për një trajtim më të specializuar, ku dhe fatkeqësisht ka ndërruar jetë aty. Shifrat e COVID-19 në vendin tonë janë ende të larta.
