Elis Rroshkodol është vrarë mesditën e sotme nga një atentat brenda në një lokali në rrugën ‘Isuf Sokoli’ në zonën e Zdrales. Autori është afruar i maskuar dhe ka qëlluar drejt tij 18 plumba. Viktima ka gjetur vdekjen e menjëhershme në vendin e ngjarjes. Policia ka gjetur në çantën e Rroshkodolit një pistoletë me fishekë në fole gati për qitje.
Autori dyshohet se është larguar me një mjet, ndërsa policia i është vënë në ndjekje. Të atin, Kujtim Rroshkodol ia kanë vrarë në 1997-ën. 36-vjeçari më së shumti në vitet e fundit ka jetuar jashtë vendit. Ai rezulton me të shkuar kriminale. Më shumë se 10 vjet me parë Rroshkodoli dyshohet se ka qenë autor edhe i plagosjes së 2 vëllezërve në Shkodër. (lexo këtu)
Në vitin 2014, ai së bashku me disa shqiptarë të tjerë është arrestuar në Belgjikë për grabitje. Por disa vite më vonë sërish është përfshirë në një ngjarje kriminale. Në vitin 2023, ishte shpallur në kërkim pasi kishte plagosur me thikë pronarin e një klubi nate.
NJOFTIMI I PLOTË:
Shkodër/Informacion paraprak
Rreth orës 12:30, në lagjen “Ahmet Haxhia”, në një lokal, dyshohet se një shtetas i paidentifikuar ka vrarë me armë zjarri shtetasin E. Rr., rreth 36 vjeç, banues në Shkodër.
Me marrjen e njoftimit, kanë shkuar menjëherë në vendngjarje, shërbimet e Drejtorisë Vendore të Policisë Shkodër dhe drejtuesit e Drejtorisë dhe të Komisariatit të Policisë Shkodër.
Në ndihmë të Policisë Vendore kanë shkuar dhe dy grupe të Forcës Kombëtare të Sigurisë, Njësia Shkodër dhe janë vënë në ndjekje të autorit.
Gjithashtu është ngritur një grup hetimor i cili ndodhet në vendngjarje dhe po vijon punën intensive në bashkëpunim me Prokurorinë, për sigurimin e provave për dokumentimin ligor të kësaj ngjarjeje.
Nga veprimet paraprake në vendin e ngjarjes, grupi hetimor ka gjetur në çantën e dorës të 36-vjeçarit E. Rr., 1 armë zjarri pistoletë me fishekë në fole gati për qitje.
Vijojnë veprimet dhe kontrollet intensive, për identifikimin dhe kapjen e autorit.
