Një “gjobë”, ka qenë motivi i vrasjes së 42-vjeçarit në Pogradec, Egli Proga, ngjarje që u shoqërua me polemika, për shkak të deklaratave kontradiktore të Policisë. Sipas bluve, ngjarja ndodhi për motive të dobëta, por mësohet se autori, Denis Meçe i ka vënë “gjobë” Eglit, duke i kërkuar atij xhiron ditore të lokalit të tij.
Egli në pamundësi monetare, i është përgjigjur Meçes duke i thënë se ka dy fëmijë për të rritur. Në këmbim Denis e dhunoi pa mëshirë derisa ai humbi jetën në spital, si pasojë e një grushti në anën e majtë të kokës që rezultoi fatale për 42-vjeçarin.
Çfarë dimë deri më tani?
Si fillim ngjarja u raportua si aksident, ku u tha se viktima humbi jetën pasi u rrëzua në rrugë, por pas pretendimit të familjarëve se ishte dhunuar, rezultoi se ai vdiq si pasojë e plagëve të marra nga dhunimi që iu bë nga Meçe, teksa u la për 30 minuta i shtrirë në Rrugë.
Policia e Pogradecit ka arrestuar autorin e dyshuar të vrasjes, 29-vjeçarin Denis Meçe, i cili gjatë një konflikti për motive të dobëta është përleshur fizikisht me viktimën jashtë ambienteve të një lokali.
Meçe është nipi i ish-drejtorit të Postës Shqiptare, Valter Gora. Gora më 2021 është arrestuar për falsifikim dokumentesh. Familjarët nuk kanë marrë ende një certifikatë vdekjeje, ndërsa në pranga janë vënë edhe 3 persona të tjerë për fshehje të krimit.
Voltan Shulku, 40 vjeç, Arian Manellari, 55 vjeç, dhe Leonidha Guçe, 47 vjeç janë lënë në detyrim paraqitje ndërsa autori Meçe në arrest me burg. Në ambientet e jashtme, ishin prezentë familjarë të viktimës të cilët mes lotësh kërkuan drejtësi për 42-vjeçarin.
