Bekim Halilaj, me origjinë nga fshati Bicaj i Kukësit, u gjet i varur më 28 shtator pranë një tabele sinjalizimi rrugor pranë qendrës tregtare Westland Shopping në Bruksel. Trupi i të riut qëndroi për disa orë i varur dhe fillimisht kalimtarët e ngatërruan me zbukurime festive, para se të njoftonin autoritetet, të cilët konfirmuan se bëhej fjalë për një trup të pajetë të lidhur me një kabllo pas tabelës.
Autoritetet belge po hetojnë disa pista, përfshirë krimin e organizuar dhe vetëvrasjen. Sidoqoftë, sipas grupit hetimor, mënyra se si u gjet trupi ka ngjallur dyshime të forta se mund të jetë bërë fjalë për një ekzekutim si pasojë e prishjes së marrëdhënieve me grupe kriminale. Një pjesë e hetuesve dyshon se ngjarja lidhet me trafikun e drogës dhe humbjen e një ngarkese të madhe kokaine.
Sipas informacionit të publikuar, 28-vjeçari dyshohet se ishte pjesë e një grupi që merrej me trafikun e kokainës. Raporte mediatike dhe burime hetimore thonë se Halilaj dyshohet të jetë rrëmbyer, ekzekutuar dhe varur si mesazh për kundërshtarët dhe si paralajmërim për këdo që do të provonte t’i dëmtonte ata. Në disa shkrime është përmendur edhe mosmarrëveshja për një ngarkesë të madhe kokaine si shkak i mundshëm i ekzekutimit.
Gazetari Artan Hoxha, që bëri të ditur identitetin e të riut, deklaroi:
“Ky është varur në kryeqytetin e BE-së. Ai ka qëndruar për orë të tëra, dhe njerëzit kanë kujtuar fillimisht se ishin zbukurimet për festat e Halloween. Më pas është bërë verifikimi. Çështja e tij është në hetim. Unë identifikimin e kam bërë në rrethana të tjera. Pritet të vijë kufoma. Familja e tij jeton në fshatin Bicaj, Babai është invalid. Një motër e ka me probleme. Ka ikur atje për një jetë më të mirë. Fillimisht ka qenë në Angli”.
Në raportimet e mëtejshme disa media referojnë viktimën si 28-vjeçarin Bekim Halilaj, duke përsëritur nga Hoxha se mënyra e ekzekutimit ishte e ngjashme me praktikat e disa karteleve meksikane, por duke vënë në dukje se një skenar i tillë mbetet i pazakontë në Europë.
Bekim Halilaj nuk ishte një emër i panjohur për drejtësinë britanike. Më 2 nëntor 2017 ai dhe tre shqiptarë të tjerë u gjetën fajtorë në Gjykatën e Southampton për trafikim droge. Grupi u deklarua fajtor për shpërndarjen e kokainës me vlerë rreth 4 milionë paund, gjatë periudhës shtator 2016 deri prill 2017. Detektivi Tim Ireson pati deklaruar atëherë: “Ata ishin në vend ilegalisht dhe shpesh përdorën identitete të sofistikuara të rreme për të mundësuar qëndrimin e tyre në Britani të Madhe dhe të gjeneronin sasi të konsiderueshme të parave të pista, duke tregtuar kokainë”.
Gjykata dha masat e mëposhtme për katër të akuzuarit: Bekim Halilaj, 21 vjeç, u dënua me shtatë vjet heqje lirie; Fitim Halilaj, 27 vjeç, me katër vjet e gjashtë muaj; Tamas Hela, 24 vjeç, me katër vjet e gjashtë muaj; dhe Nuri Muçmataj, 26 vjeç, me 8 vjet e 6 muaj burg. Sipas raportimeve, të katër ishin duke jetuar në mënyrë të paligjshme në Britani.
Sipas Hoxhës, grupi i të riut ishte i përfshirë në aktivitete shpërndarjeje dhe më vonë pjesëtarëve u kapën sasi që shkonin deri në 30 kg kokainë. Ai tha se kreu i grupit u arrestua dy vite më vonë në Belgjikë dhe u ekstradua në Angli. Pas daljes nga burgu, Halilaj dhe disa bashkëpunëtorë dyshohet se kanë vijuar aktivitetin e tyre në Belgjikë, ku Antwerp njihet si një nga qendrat e mëdha të trafikut të kokainës në Europë.
Hetimet belge po vazhdojnë dhe autoritetet pritet të dalin së shpejti me një përfundim zyrtar mbi shkakun e vdekjes. Në pritje të rezultateve zyrtare të autopsisë dhe provave të tjera forenzike, ngjarja ngre shqetësime për praninë e metodave brutale të dhunës që mund të përdoren në kontinent, si dhe për thellimin e lidhjeve ndërkombëtare të trafikut të drogës.
Në sfond të kësaj tragjedie që prek një familje me situatë të vështirë shëndetësore, rasti mbetet nën hetim dhe autoritetet belge po verifikojnë çdo pistë që mund të çojë tek zbardhja e plotë e asaj që ndodhi.
