Hetuesit e çështjes, të udhëhequr nga prokurori i Romës Giuseppe Cascini, kanë zbuluar se Mark Samson ka dhënë deklarata të rreme në mënyrë të përsëritur gjatë hetimeve për vrasjen e 22-vjeçares shqiptare, Ilaria Sula.
Detaje të reja kanë dalë në dritë lidhur me mënyrën se si Samson veproi pas krimit të ndodhur më 26 mars, kur ai vrau Ilarian në dhomën e tij të gjumit. Filipinasi ka ndryshuar dëshminë, duke pohuar se ai vetë e nxori valixhen që përmbante trupin e pajetë nga shtëpia dhe e vendosi në makinën e tij, duke përjashtuar ndihmën e një personi tjetër.
Në dëshminë e fundit, ai përmend gjithashtu praninë e një dëshmitari, i cili, sipas tij, e pa teksa tërhiqte valixhen. Ky pretendim ka ngritur pikëpyetje të reja për hetuesit, pasi, pavarësisht jehonës mediatike që rasti ka marrë, dëshmitari nuk është paraqitur ende.
“E ngarkova vetë valixhen në makinë, jam i fortë, më vini në provë. Më ka parë edhe një person”, shkruan 23-vjeçari në një letër të dorëzuar prokurorisë së Romës nga avokatët e tij.
Ndërkohë, hetuesit kanë zbuluar se Samson ka fshehur një sërë faktesh gjatë hetimeve. Ai kishte deklaruar rrejshëm për përparimin në studimet e tij në arkitekturë, duke mohuar se kishte dhënë vetëm një provim. Po ashtu, hetimet kanë treguar se nëna e tij ka qenë e përfshirë në ndihmën për të pastruar gjurmët e krimit, duke hequr gjakun nga vendngjarja.
Gjithashtu, Samson kishte tentuar të devijonte hetimet duke përdorur telefonin e viktimës për të simuluar lëvizje të rreme drejt Napolit, me qëllimin për të krijuar idenë se Ilaria ishte ende gjallë dhe kishte takuar një person të njohur përmes internetit.
