Në shtëpinë e “Djallit” nuk ka pushim. Kuqezinjtë po kryejnë përgatitjet e fundit, në prag të një nga tre finaleve të fundit në fazën e ligës së Champions League, ajo që do të luhet në të mërkurën në San Siro ndaj Crvena Zvezdës.
Seanca e fundit stërvitore u vëzhgua nga Zlatan Ibrahimoviç i shoqëruar edhe nga ish kapiteni i Milanit, braziliani Thiago Silva, i cili kishte mbërritur në Milanello për të vizituar ish skuadrën e tij.
Për Milanin janë të ndaluara hapat fals, nëse ekipi i Paulo Fonsecës kërkon të evitojë fazën e Play Off-it e të kualifikohet direkt mes 8 skuadrave më të mira.
Humbja e fundit në kampionat ndaj Atalantës ka trazuar ujërat tek kuqezinjtë, që këtë sezon nuk po tregojnë stabilitet në rezultate, duke humbur terren me ekipet kryesuese.
Ndaj edhe për këtë arsye fitorja ndaj kampionëve serbë në Champions mund t’i dhurojë motivimin e duhur ekipit të Fonsecës, për të rifituar vetëbesimin e për t’u rikthyer së qenuri kompetitiv edhe në Serie A.
Megjithatë krahas humbjes së fundit ndaj Atalantës, ajo që shqetëson teknikun portugez janë dhe mungesat e rëndësishme, si Pulisiç dhe Okafor, që i shtohen listës së lojtarëve jo disponibël.
Mbi të gjithë shqetësimi është për futbollistin amerikan, i cili do duhet të rrijë disa ditë, ndoshta edhe javë larg fushave të blerta. Përgjgijet e para të analizave tregojnë për një tërheqje të lehtë të muskulit, ndaj kuqezinjtë janë optimistë për rikthimin e tij në fundin e këtij muaji, kur Milan do të luajë fillimisht në transfertë ndaj Veronës më 20 Dhjetor, ose për sfidën e fundit për këtë vit, atë ndaj Romës më 29 Dhjetor.
