Ditën e sotme policia e Tiranës ka arrestuar një person i cili kishte lidhje me rrëmbimin e një 31-vjeçari shqiptar në Greqi.
Ndërsa 4 shqiptarë, midis tyre edhe një femër u arrestuan në Greqi.
I riu Jetmir Terollari kishte 5 ditë që ishte marrë peng në një banesë në Greqi. Kallëzimin për humbjen e Terollarit e kishte bërë vëllai i tij, i cili kishte humbur kontaktet prej disa ditësh.
31-vjeçari Terrollari, sipas mediave greke, ka udhëtuar drejt vendit fqinj me ftesë të së dashurës së tij dhe u rrëmbye në një stacion autobusi.
E dashura i kishte thënë se i kishte gjetur punë dhe se do të qëndronin bashkë në Greqi. Identiteti i vajzës ende nuk është bërë me dije, por mësohet se ajo është arrestuar në Greqi bashkë me 3 persona të tjerë të cilët e mbajtën peng prej 5 ditësh Jetmir Terollarin.
Për lirimin e tij, pengmarrësit kishin kërkuar shumën e 10 mijë eurove.
Njoftimi i policisë:
Operacion policor ndërkombëtar mes Policisë së Tiranës, Prokurorisë së Krimeve të Rënda, Departamentit të Policisë Kriminale në P.SH dhe Policisë greke, me ndërmjetësimin e Interpol Tirana
Finalizohet operacioni policor i koduar ”Korinthos”, iniciuar nga Drejtoria Vendore e Policisë Tiranë.
Arrestohen 5 shtetas të dyshuar si autorë të pengmarrjes së një shtetasi, nga këta 1 i arrestuar në Shqipëri dhe 4 në Greqi.
Falë inicimit nga Policia e Tiranës, dhënies së informacionit në kohë reale Policisë greke me adresën e saktë të vendndodhjes së pengmarrësve dhe mbajtjes së pengut, Policia greke bëri të mundur lirimin e pengut dhe arrestimin e katër shtetasve.
Specialistët e Sektorit për Hetimin e Krimeve të Rënda ndaj Jetës dhe Pronës në Drejtorinë Vendore të Policisë Tiranë morën informacion se në një fshat të Korinthos, Greqi, disa shtetas shqiptarë për motive të dobëta kishin marrë peng një shtetas nga Tirana dhe i kërkonin 10.000 euro për ta lënë të lirë.
Pas një hetimi disaditor duke përdorur metodat speciale të hetimit, Sektori i Krimeve të Rënda ndaj Jetës dhe Pronës në Drejtorinë Vendore të Policisë Tiranë, në bashkëpunim me Prokurorinë pranë Gjykatës së Shkallës së Parë për Krime të Rënda Tiranë dhe Policinë greke, me ndërmjetësimin e Interpol Tirana, finalizoi me sukses operacionin policor ndërkombëtar “Korinthos”.
Policia e Tiranës, falë informacionit të grumbulluar për vendndodhjen e saktë të autorëve dhe vendit ku mbahej peng shtetasi J.T., i ka dhënë nëpërmjet Interpol Tirana, Policisë greke informacion të saktë në kohë reale mbi vendndodhjen (adresën e banimit) të personit të marrë peng dhe pengmarrësve.
Policia greke mbi bazën e informacioneve të marra nga Policia e Shtetit bëri të mundur arrestimin në flagrancë të shtetasve:
Xh.N., 49 vjeç, banues në Tiranë.
H.M., 35 vjeçe, banuese në Tiranë.
B.M., 41 vjeç, banues në Tiranë.
M.M., 19 vjeç, banues në Tiranë.
Gjithashtu, si rezultat i ndërhyrjes në kohë është bërë i mundur lirimi i pengut, shtetasi J. T., banues në Tiranë.
Po në vijim të operacionit Policia e Tiranës bëri kapjen dhe arrestimin në flagrancë të shtetasit:
- P., 24 vjeç, banues në Tiranë, (bashkëpunëtor)
Policia e Tiranës në bashkëpunim me Prokurorinë e Krimeve të Rënda Tiranë vazhdon punën intensive për dokumentimin e plotë ligjor të kësaj ngjarjeje.
Materialet do i kalohen për ndjekje të mëtejshme Prokurorisë pranë Gjykatës së Shkallës Parë për Krime të Rënda, për veprat penale “Shtrëngimi me anë të kanosjes ose dhunës për dhënien e pasurisë” dhe “Heqja e paligjshme e lirisë“ e kryer në bashkëpunim.
