Detaje të reja janë zbuluar nga aksidenti i regjistruar mbrëmjen e djeshme në sheshin “Shqiponja”, ku u përmbys një mjet “Mercedes Benz G Class”, i blinduar, me targa ruse.
Drejtuesi i mjetit, 34-vjeçari Eldin Dergjini është vëllai i deputetes Ambra Borova, e futur nga radhët e LSI-së.
Sipas “Faxweb”, emri i vërtetë i Dergjinit është Elti Borova.
Ai është djali i muzikantit të njohur shkodran, Luan Borova.
I riu është detyruar të ndryshojë mbiemrin, si pasojë e precedentëve penalë të mëparshëm.
Në dëshminë përpara hetuesve, 34-vjeçari ka thënë se e ka goditur dikush nga mbrapa, ndërsa më pas ka dalë dhe ka marrë një taksi, e cila e ka shoqëruar deri në spital.
Përsa i përket makinës, ai u shpreh se e kishte sjellë nga jashtë dhe po priste që ta pajiste me dokumenta.
Dergjini rezulton një person me precedentë penalë të mëparshëm.
Ai është arrestuar në Itali për trafik droge dhe në Shqipëri për kundërshtim të punonjësit të policisë.
Automjeti aktualisht ndodhet në drejtorinë e Policisë së Tiranës, ku po i nënshtrohet kontrolleve.
