Disa ditë më parë një 61- vjeçare e infektuar me COVID-19, ishte shtruar fillimisht në Spitalin e Fierit ku nuk kishte deklaruar se kishte qenë në Itali.
Pasi ajo rezultoi pozitive në testin e Coronavirusit, u ngritën dyshimet se edhe stafi mjekësor që i ka shërbyer asaj mund të ishte infektuar.
Kështu, 17 mjekë, infermierë dhe staf ndihmës të Spitalit të Fierit u vetëkarantinuan deri në publikimin e rezultateve të analizave.
Së fundmi, bëhet me dije se mostrat e marra sot kanë dalë negative dhe i gjithë stafi gëzon shëndet të plotë e tashmë mund të rikthehet në punë.
Në rang botëror deri tani janë shënuar 7,531 viktima dhe janë regjistruar mbi 194 ,000 të infektuar në 163 shtete, ndërsa në vendin tonë deri tani ka humbur jetën 1 person dhe janë infektuar 55 të tjerë, teksa në Kosovë janë 19 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
