Kryetari i partisë “Mundësia”, Agron Shehaj, ishte këtë të martë i ftuar në emisionin “Now me Erla Mëhillin” në Euronews Albania, ku shprehu shqetësimin se në Shqipëri shteti ka degraduar në atë pikë sa një përmendje e thjeshtë e emrit të kryeministrit mjafton për të vënë në lëvizje institucionet.
Shehaj solli si shembull një ngjarje të ndodhur një vit më parë, kur një 20-vjeçar, duke u prezantuar si Klea Rama, arriti të mashtrojë zëvendësministren e Arsimit.
Ai i sugjeroi asaj realizimin e një projekti, duke u prezantuar si “mbesa e kryeministrit”.
Sipas Shehajt, vetëm përmendja e lidhjes së supozuar me kryeministrin mjaftoi që zëvendësministrja të mobilizonte të gjithë institucionin dhe të shpallte konkurse.
Madje, Shehaj publikoi një video ku zëvendësministrja i uronte mashtruesit “Gëzuar festat 2024” përmes një mesazhi publik.
“Do tregoj diçka që është vërtet absurde dhe tregon që shteti ka marr fund. Para një viti në shtator një djalë nga Devolli 20-vjçar i dërgon një sms zëvendësministres së arsimit dhe i thotë jam Klea Rama, mbesë e kryeministrit Edi Rama dhe dua t’ju propozoj një projekt për shkollat e mesme. Për këtë u bë një hetim më pas.
Zëvendës ministria nuk e verifikoi fare se kush ishte por i vuri të gjithë në punë, krijoi grupet e punës, koordinatorët, hapi konkurse dhe një vit rresht u vunë në lëvizje se ky djali u prezantua si mbesa e kryeministrit. Ka video ku drejtoresha e shkollës mbledh nxënësit dhe u lexon mesazhin e Klea Ramës, kjo edhe sikur të ishte e vërtet është skandaloze”, tha Agron Shehaj ndërsa nxori edhe videon e zëvendës ministres së arsimit, Nina Guga teksa falënderon “Klea Ramën” dhe i uron asaj festat e fundivit.
