Gjykata e Larisës në Greqi ka shpallur pak ditë më parë vendimin e shkallës së parë për Fatmir Tarellarin, i cili akuzohet për vrasjen e kunatit të tij, Erjon Pelivani, në janar të vitit të kaluar.
Tarellari, baba i tre fëmijëve, është dënuar me 14 vite burg. Gjatë seancës gjyqësore ai kërkoi ndjesë për veprimin e tij, duke deklaruar se krimi ishte kryer në gjendje tronditjeje të thellë, pasi kishte mësuar se vajza e tij ishte abuzuar seksualisht për një periudhë 12-vjeçare nga viktima.
Një i afërm i autorit tha se vendimi i gjykatës erdhi pas një sërë dëshmish, të cilat zbuluan edhe një detaj tjetër tronditës: partnerja e Tarellarit, motra e viktimës, kishte qenë dëshmitare e një akti përdhunimi që dymbëdhjetë vite më parë, por nuk kishte reaguar apo denoncuar ngjarjen.
Nëna e Erjon Pelivanit ka folur në emisionin me “Zemër të Hapur”, ajo u shpreh se në telefonin e djalit të saj të ndjerë nuk është gjetur asnjë lidhje me vajzën e autorit.
Vajza tentoi t’ia hidhte fajin djalit tonë.
Ajo nuk kishte asnjë fakt, i kishte të gjitha gënjeshtra dhe falsifikime. U zbërthyen telefonat e saj dhe djalit. Janë ende në polici sepse e kërkova si nënë ta kisha si kujtim por ende nuk ma kanë dhënë.
Me Abazin ishim në shtëpi. Ai më kishte marrë çupën për djalin. Më tha aman thuaji Erit të vijë të më ndihmojë, kishin 3-4 muaj që nuk flisnin për gjëra koti. Mirë i kishte thënë çupa i them unë dhe komunikoi me vëllanë.
Ai pyeti babanë nëse duhet të shkonte apo jo pasi nuk flisnin dhe i ati i tha: Ik të keqen babi, por mos bëj shamatë. Po nuk e ndihmove ti kush do ta ndihmojë. Edhe unë i thash ik ndihmoje sepse u gëzuar që sa mirë të pajtohen e të flasin.
Djalin nuk më lanë t’i hap as arkivolin ta shoh, ia kishte bërë kokën copë-copë. E pashë vetëm në foton që avokati i dha gjykatës. Nuk di se çfarë kam bërë më pas”, tha ajo.
