Roja Bregdetare dhe Policia Kufitare shqiptare po vijojnë prej disa ditësh patrullimet intensive në det në përpjekje për të gjetur një person që dyshohet se është zhdukur pas rrëzimit nga një traget i linjës Greqi-Itali.
Pavarësisht kërkimeve të vazhdueshme në ujërat territoriale pranë Vlorës, deri më tani nuk është gjetur asnjë gjurmë e tij.
Pamje nga operacionet tregojnë patrullimet e anijeve të rojës bregdetare në zonën ku dyshohet se mund të ketë ndodhur ngjarja.
Autoritetet kanë kërkuar bashkëpunimin edhe të mjeteve të tjera që lundrojnë në atë rajon, përfshirë anijet turistike dhe peshkarexhat, të cilat janë udhëzuar të jenë të vëmendshme dhe të raportojnë çdo shenjë apo objekt të dyshimtë në det.
Sipas ekuipazhit të tragetit, personi është shpallur i zhdukur, por nuk ka ende një konfirmim të qartë mbi rrethanat, nëse ai ka rënë aksidentalisht, është hedhur me vetëdije apo ka ndodhur ndonjë incident i panjohur që ka çuar në zhdukjen e tij.
Hetimet janë ende në zhvillim, ndërsa strukturat përgjegjëse mbeten në gatishmëri për çdo informacion të ri që mund të ndihmojë në zbardhjen e ngjarjes.
