26 vjet pas masakrës së 34 civilëve shqiptarë në fshatin Burim të Malishevës në vitin 1999, policia e Kosovës ka arrestuar një të dyshuar.
Sipas raportimeve të mediave vendore, Ramadan Morina u arrestua në Prishtinë të martën mëngjes, me autorizimin e Prokurorisë Speciale, nën dyshimin për kryerjen e veprës penale “krime lufte kundër popullatës civile”.
Ai dyshohet se gjatë luftës në Kosovë, më 29-31 mars 1999, në bashkëpunim me pjesëtarë të forcave policore dhe ushtarake serbe, ka marrë pjesë në vrasjen e 34 civilëve shqiptarë në fshatin Burim.
Prokuroria Speciale ka siguruar prova materiale, përfshirë dëshmi nga dëshmitarë okularë dhe të mbijetuar, dhe brenda afatit ligjor do të paraqesë kërkesën për caktimin e paraburgimit në Gjykatën Themelore të Prishtinës.
Që nga përfundimi i luftës, dhjetëra persona janë dënuar për krime lufte përpara institucioneve vendore dhe ndërkombëtare. Hetimet për krimet e luftës në Kosovë nga viti 2000 deri në 2008 u kryen nga Misioni i Kombeve të Bashkuara, ndërsa nga viti 2008 nga Misioni i Bashkimit Evropian për Sundimin e Ligjit, i cili në vitin 2018 dorëzoi dosjet në Prokurorinë e Kosovës dhe gjykatat vendore.
Gjatë konfliktit më 1998-1999, mbi 13.000 civilë u vranë dhe mijëra të tjerë u zhdukën. Aktualisht, më shumë se 1.600 persona vazhdojnë të jenë të pagjetur, kryesisht shqiptarë.
