Detaje të reja janë zbuluar në lidhje me arrestimin e pronarit të UET, Henri Çili, gjatë mbrëmjes së djeshme.
Mësohet se Prokuroria e Përmetit ka nisur hetimet që në shtator të 2019-ës.
Gjatë hetimeve dyshohet se Çili ka komunikuar me babanë e Arbion Alikos, Adil Aliko.
Prokuroria ka ngritur disa akuza ndaj Çilit, midis të cilave, falsifikim dokumentash, mashtrim dhe ushtrim i ndikimit të paligjshëm te organet e drejtësisë.
Dyshohet se Çili i ka marrë shuma të konsiderueshme parash dhe prona Adil Alikos, me premtimin se do ndikonte në vendimin e gjykatës për Arbion Alikon.
Në banesën e shoferit të Çilit është gjetur edhe dosja e rekursit të Arbjon Alikos.
Ky i fundit është dënuar me burgim të përjetshëm, si pjesë e grupit të zjarrit që vranë efektivin e RENEA-s, Ibrahim Basha.
Vëllai i tij ndërkohë është dënuar me 20 vite burg.
Ibrahim Basha u vra gjatë aksionit anti-kanabis në Lazarat në 2014-ën, ndërsa kolegët e tij, Jetmir Isaj dhe Perlat Hamitaj mbetën të plagosur.
