Një person në Shqipëri dyshohet të jetë i infektuar me variantin Delta të koronavirusit, i njohur edhe si varianti indian. Sipas A2, mësohet se personi që dyshohet se është i infektuar me variantin indian të koronavirusit, ka ardhur ditët e fundit në vendin tonë nga Britania dhe ka shfaqur simptoma të ngjashme me ato të variantit Delta.
Kujtojmë se deri më tani ende nuk ka një konfirmim nga autoritetet për prezencë të variantit Delta. Gjithashtu ministrja e Shëndetësisë në një dalje publike u shpreh se një sërë testesh të dyshuara janë dërguar në Gjermani për konfirmim.
Simptomat e variantit Delta
Shkencëtarët nuk kanë ende të dhëna përfundimtare për të treguar nëse simptomat e variantit Delta ndryshojnë nga ato të shkaktuara nga variante të tjera.
Por pas një studimi të realizuar në Mbretërinë e Bashkuar, ku 19 nga 20 raste të reja të COVID-19 janë nga varianti Delta, ata kanë dalë në disa përfundime, duke listuar simptomat e mëposhtme:
-dhimbje koke
-rrufë
-dhimbje fyti
-teshtitje
-kollitje e vazhdueshme.
Simptomat të cilat ishin më te theksuara në versionin e mëparshëm si humbja e nuhatjes apo ethet, në këtë variant pakësohen.
Studiuesit që qëndrojnë pas studimit pranojnë se ka disa arsye për këto ndryshime në simptomat kryesore, që nuk lidhen drejtpërdrejt me variantin delta, por me procesin e vaksinimit dhe mënyrën sesi reagojnë njerëzit që kanë qenë infektuar më parë.
