Shqipëria duket se nuk do të ketë mbështetje financiare për bujqësinë nga Brukseli zyrtar.
Zëri i Amerikës raporton se Komisioni Europian ka lënë në pritje vendin tonë për fillimin e zbatimit të Programit IPARD III në mbështetje të bujqësisë.
Ky vendim i fortë vjen pas hetimeve të ndërmarra mbi akuzat për korrupsion në lidhje me zbatimin e këtij programi. Kjo nuk është hera e parë që KE merr vendime të tilla, në korrik të këtij viti u ndërprenë rimbursimet në kuadër të këtij programi për shtetin shqiptar. Asokohe Ministria e Bujqësisë e trajtoi rastin si një çështje të karakterit administrativ, duke shmangur përgjegjësinë në lidhje me abuzimin e këtyre fondeve.
Raporti i hartuar nga zyra europiane kundër mashtrimit, OLAF, është dorëzuar pranë autoriteteve shqiptare, prej të cilave, pritet që ta trajtojnë me seriozitet këtë çështje. Theksojmë se autoritetet kanë të drejtën e mos-pranimit dhe të justifikimit apo ofrimit të fakteve kundërshtuese në lidhje me këtë raport.
Ndonëse Brukseli e ngriti seriozisht këtë çështje, autoritet në vendin tonë e cilësuan si “procedura normale të Bashkimit Europian në kushtet kur ka nevojë të verifikohen shpenzime të dyshuara për aktivitet jo konform rregullave të përcaktuara”. Madje kështu ushpreh edhe ministrja e Bujqësisë në atë kohë, Frida Krifca. Por, pas kësaj ngjarjeje, dy muaj më pas zonja Krifca u la jashtë kabinetit qeveritar dhe vendin e saj e zuri Anila Denaj.
Burimi: VOA
