Italia vijon të shënojë ulje të ndjeshme të numrit të viktimave të shkaktuara nga Covid-19 pasi që prej fillimit të pandemisë, ditën e djeshme është regjistruar bilanci më i ulët ku në 24 orë janë shënuar 99 viktima dhe 451 raste të reja.
Mirëpo, gjatë 24 orëve të fundit shifrat janë rritur, pasi autoritetet njoftuan se u regjistruan 162 viktima dhe në total numërohen 32,169 të vdekur.
Po ashtu, janë raportuar 813 raste të reja, duke e çuar në 226,699 numrin e përgjithshëm e personave të infektuar.
Në rritje është dhe numri i të shëruarve, pasi këtë të martë u raportua për 2075 të dhëruar, ndërsa në total 129,401 persona kanë arritur të fitojnë betejën me Covid-19.
Aktualisht numri i personave aktiv me koronavirus është 65,129 prej të cilëve 713 janë në gjendje të rëndë shëndetësore.
Më 16 maj qeveria italiane ka aprovuar një dekret të ri ligjor me masa urgjente në përballimin e pandemisë Covid-19.
Prej datës 18 maj e deri më 2 qershor lejohet lëvizja e lirë nga një komunë në tjetrën brenda të njëjtit rajon, por ndalohet lëvizja nga një rajon në tjetrin me mjete publike e private nga një rajon në tjetrin.
Po ashtu, të hënën do të hapin të gjitha objektet e kultit të të gjitha besimeve, si dhe palestrat e pishinat.
Nga data 3 qershor do të lejohet lëvizja e lirë në të gjithë territorin kombëtar e limitimet mund të kryhen vetëm nga urdhëresa rajonale në varësi të rrezikut epidemik i pranishëm në këto zona.
Gjithashtu prej datës 3 qershor Italia do hapë kufijtë e do lejojë lëvizjet me vendet e tjera në përputhje me kufizimet e vendosura nga Bashkimi Evropiane.
Dekreti i ri qeverisë italiane konfirmon ndalimin e lëvizjes për personat në regjim karantinimi deri sa strukturat shtetërore të vërtetojnë shërimin e tij nga Covid-19 dhe po ashtu do të vazhdojë të jetë i ndaluar grumbullimi i njerëzve në vende publike e të hapura.
Sakaq, aktivitetet tregtare e prodhuese do të jenë të hapura e do të respektojnë protokollin kombëtar të sistemit të sigurisë së shëndetit në punë e të distancimit social.
Për këdo që shkel këto masa do të aplikohet gjoba nga 400 në 3,000 euro, ndërsa kur një person kapet duke lëvizur me automjetin e tij, gjoba do të jetë edhe më e madhe.
