Numri i pacientëve që vuajnë nga sëmundjet alergjike në Shqipëri është dyfishuar, duke prekur të gjitha grupmoshat.
Sipas mjekëve alergologë, ky fenomen lidhet jo vetëm me ndryshimet e temperaturave të shkaktuara nga ngrohja globale, por edhe me faktorë të tjerë ambientalë, si ndotja e ajrit.
“Alergjitë janë kthyer në një shqetësim serioz, pasi kemi gjithnjë e më shumë pacientë me probleme kronike,” thotë alergologia Eris Mësonjësi. Sipas saj, sëmundjet alergjike jo vetëm që po zgjasin më shumë në kohë, por pacientët po preken nga disa alergjenë njëkohësisht, duke e vështirësuar trajtimin.
Një tjetër faktor që ndikon është ekspozimi i zgjatur në ambiente të mbyllura, si dhe kontakti i shpeshtë me kafshë shtëpiake, të cilat janë burim alergjenësh.
“Ndotja ambientale e bën polenin më agresiv, duke e përkeqësuar alergjinë stinore. Për më tepër, kemi shpërthimin e disa llojeve të poleneve njëkohësisht, duke e bërë të vështirë përcaktimin e shkakut kryesor për secilin pacient,” shpjegon Mësonjësi.
Mjekët paralajmërojnë se një alergji e patrajtuar mund të çojë në asmë bronkiale, ndaj këshillojnë konsultimin me alergologun për trajtim të specializuar.
“Alergjitë respiratore mbartin gjithmonë rrezikun e zhvillimit të astmës, ndaj është e rëndësishme që pacientët të marrin masat e duhura në kohë,” përfundon specialistja.
