Numri i çifteve që kërkojnë zgjidhjen e martesës në Korçë po rritet me ritme shqetësuese. Gjatë vitit 2024, në Gjykatën e Shkallës së Parë janë regjistruar plot 750 kërkesa për divorc thuajse dy herë më shumë krahasuar me vitin 2023, kur numri ishte 402.
Avokati Mateo Balli thotë se arsyet kryesore që çojnë çiftet drejt ndarjes mbeten të njëjtat: emigracioni, varfëria dhe dhuna në familje.
Ai thekson se emigracioni ka ndikuar në ndarjen e çifteve me shumë vite martesë, ndërsa në rastet kur të dy partnerët jetojnë në Shqipëri, janë kryesisht çiftet e reja që kërkojnë divorcin.
Rritja e shpejtë e kërkesave për zgjidhje martese tregon jo vetëm një fenomen në zgjerim, por edhe problematika sociale që prekin më thellë familjen, përfshirë ndikimin emocional dhe ekonomik që përjetojnë fëmijët pas divorcit.
