Një aksident i rëndë rrugor është shënuar sot në zonën e Fushë-Krujës, ku janë përfshirë dy automjete, një “Audi R8” me ngjyrë portokalli dhe një “Mercedes Benz”.
Si pasojë e përplasjes, mjeti “Audi” ka pësuar dëmtime të rënda në pjesën e përparme, ndërsa automjeti tjetër ka përfunduar jashtë rruge, në një kanal anësor.
Nga të dhënat paraprake, mësohet se tre persona janë plagosur rëndë. Kalimtarë dhe qytetarë që ndodheshin pranë vendit të ngjarjes kanë ndërhyrë menjëherë, duke u dhënë ndihmën e parë të lënduarve, në pritje të ambulancës.
Njoftimi i policisë:
Fushë Krujë/Informacion paraprak:
Rreth orës 11:00, në aksin rrugor “Tapizë-Fushë Krujë, automjeti me drejtues shtetasin E. H., rreth 28 vjeç është përplasur me automjetin me drejtues shtetasin K. D., rreth 19 vjeç.
Si pasojë janë dëmtuar dy drejtuesit e automjeteve dhe pasagjeri në automjetin me drejtues 28-vjeçarin, shtetasi S. H., rreth 30 vjeç, të cilët ndodhen në spital, nën kujdesin e mjekëve.
Grupi hetimor po punon për sqarimin e rrethanave të aksidentit.
Materialet procedurale iu referuan Prokurorisë së Tiranës, për veprime të mëtejshme.
