Gjatë një interviste në MCN TV, gazetarja Klodiana Lala ka theksuar problematikat e rënda që shoqërojnë proceset zgjedhore në disa qytete të vendit. Ajo ka vënë në dukje vonesat në hetime dhe kriminalitetin elektoral, duke theksuar se qytete si Durrësi dhe Elbasani po përjetojnë situata të ngjashme me ato të Kolumbisë, ku vota blihet ose merret me forcë.
“Durrësi nuk ka nevojë, është si Kolumbia sot. Elbasani po ashtu. Edhe po nuk e shite votën, ta marrin me kallash te koka. Koha do ta tregojë, se diku do të mbetet një provë,” – tha Lala.
Më tej, gazetarja solli një shembull konkret mbi funksionimin e hetimeve në Shqipëri, duke përmendur rastin e marrjes në pyetje të zyrtarit Arbjan Mazniku nga Prokuroria e Tiranës, dhe theksoi vonesat e mëdha që karakterizojnë sistemin e drejtësisë.
“Para pak ditësh kam raportuar për pyetjen e zotit Arbjan Mazniku në Prokurorinë e Tiranës. Zoti Mazniku nuk u denoncua direkt, ishte Këllici që kallëzoi zotin Veliaj për një rrugë. Prokurorisë iu deshën dy vjet. Vetëm pas dy vitesh u thirr për ta marrë në pyetje. Sot, pasi është marrë dëshmia e zotit Mazniku, pas dy vitesh, po bëhet gati dosja për SPAK,” – deklaroi ajo.
Lala theksoi se, edhe pse hetimet mund të nisin në kohë, rezultatet e tyre vonojnë të ndihen, duke sjellë si shembull dosjet e njohura “184” dhe “339”, të cilat ekspozuan fenomenin e blerjes së votës, por nuk prodhuan ndikimin e pritur për një periudhë të gjatë.
Në mbyllje, gazetarja u shpreh se, pa një bashkëpunim real mes qytetarëve dhe institucioneve, kriminalizimi i zgjedhjeve do të vazhdojë të mbetet një problem i pazgjidhur.
“Nëse nuk ka bashkëpunim mes qytetarëve dhe institucioneve, nuk mund t’u kërkohet vetëm policisë dhe prokurorisë,” – përfundoi Lala.
