Kryeminsitri Edi Rama ka folur sot për një prej temave më të bujshme këto ditë, mbetjet në Durrës dhe djegia e plehrave në Manzë.
Në një intervistë për “Open”, Rama u shpreh se situata do zgjidhet brenda javës dhe të gjitha mbetjet e Durrësit do dërgohen në landfillin e Sharrë në Tiranë.
Po ashtu, kryeministri u shpreh se kjo situatë ka ardhur si pasojë e projektit të ridimensionit të Porto Romanos, që është projektuar që të bëhet një park i madh urban.
“Po shpjegoj shumë shkurtimisht arsyet e këtij ngërçi dhe zgjidhjen e tij. E gjitha nis nga një tranformim që ne e kemi nisur, që është për Porto Romanon. Kemi bërë një projekt ambicioz, për ndërtimin e një parku të madh urban kur për disa dekada ka qenë me vargmale plehrash dhe mbi popullim derrash, derra të vërtetë. Pas tërmetit në situatën e befasishme që u gjendëm e shpejtuam vënien në lëvizje të projektit dhe filluam sistemimin e terrenit atje. Këto ditë që flasim po kryhet një proces finalizmi dhe negocimi me bashkinë e Durrësit dhe agjencinë shtetërore dhe shumë shpejt brenda javës do kemi një marrëveshje, për të bërë lëvizjen e të gjitha mbetejve në Durrës drejt landfillit të Sharrës”, u shpreh Rama.
Pak ditë më parë në media, u denoncuan rastet kur koshat e plehrave në Durrës nuk ishin prekur me dorë për disa ditë me radhë nga punonjësit e Bashkisë.
Mbyllja e vend-depozitimit të Porto Romanos, ka bërë që mbetjet e Bashkisë Durrës të dërgohen në Manzë për djegien e mbeturinave.
Mesa duket Bashkia ka gjetur këtë zgjidhje si të vetmen zgjidhje për të pastruar koshat e mbeturinave dhe ambientet pranë tyre, duke i çuar në Manzë për t’i djegur.
Plehrat janë hedhur pranë qendrave të banuara, duke “helmuar” ajrin e banorëve të zonës mbrëmjen e djeshme, duke rrezikuar seriozisht shëndetin e tyre.
Pas zhurmës së shkaktuar dhe rezistencës së banorëve, autoritetet kanë gjetur mënyrën e duhur për t’i shpëtuar skandalit dhe jo për të zgjedhur problemin që shqetëson banorët, dhe tashmë po bëhet dhe groposja e mbeturinave pas djegies së tyre.
Me mjete të rënda kanë gërmuar kodrën dhe të gjithë dheun e nxjerrë prej saj e kanë përdorur për të mbuluar plehrat, e jo vetëm që nuk është zgjidhur asnjë problem, por është shtuar dhe një tjetër: Gërryerja e kodrës.
LEXO EDHE: Tenderi korruptiv që solli katastrofën mjedisore në Manzë dhe ktheu Durrësin në “kosh mbeturinash”!
