Vrau për një ‘fjalë goje’ shoferin Idajet Dulla, por sot autori i krimit banal ka rënë në prangat e policisë.
Kanë qenë efektivët e Policisë së Durrësit që kanë vënë në pranga Arbër Koten, 26 vjeç, autorin e vrasjes me thikë në Shkozet të Idajet Dullës.
33-vjeçari Dulla, humbi jetën pasi ishte qëlluar me thikë në zemër.
Autori Arbër Kote, nga Durrësi, djali i i ish-Drejtorit të Burgut, Astrit Kote, punonte si shofer i një urbani që transportonte punonjës të një fasonerie në zone, kurse viktima, Dulla, drejtonte një furgon mallrash, që me sa duket i kishte zënë rrugën shoferit të fasonerisë.
Për këtë shkak, mes dy shoferëve ka nisur një konflikt i ashpër, që përfundoi me përdorimin e thikës dhe vdekjen e shoferit të furgonit.
33-vjeçari Idajet Dulla, u dërgua në Spitalin rajonal të Durrësit, por nuk i mbijetoi plagës vdekjeprurëse në zemër.
Policia e Durrësit njoftoi se: “menjëherë pas njoftimit të marrë për ngjarjen e ndodhur, organizoi punën dhe falë veprimeve të shpejta dhe profesionale bëri të mundur zbardhjen, identifikimin dhe kapjen e autorit. Në vijim të veprimeve u arrestua në flagrancë shtetasi A.K., 26 vjeç, banues në Durrës.
Ky shtetas dyshohet se pas një konflikti të çastit për motive të dobëta, ka goditur me mjet prerës (thikë), shtetasin I.D., 33 vjeç, i cili si pasojë e plagëve të marra, ka ndërruar jetë në Spitalin Rajonal Durrës.
Materialet do t’i kalojnë Prokurorisë së Rrethit Gjyqësor Durrës për veprat penale “Vrasja me dashje” dhe “Mbajtja pa leje e armëve të ftohta”.
/GazetaReforma.com/
