Maqedonia e Veriut vendos që nga 1 shtatori të gjithë shtetasit vendas ose të huaj që do të hyjnë dhe dalin në territorin e saj, duhet të paraqesin patjetër certifikatën e vaksinimit, ose certifikatë/vërtetim për kalimin e COVID-19 në 45 ditët e fundit, ose vërtetim mjekësor me rezultat negativ nga testi PCR SARS-CoV-2, 72 orë para hyrjes në territorin e Republikës së Maqedonisë së Veriut.
Ndërsa për qytetarët vendas që do të kthehen në Maqedoni pas 1 shtatorit dhe nuk kanë një test PCR, ose certifikatë vaksinimi ose vërtetim që e kanë kaluar COVID-19, do të vendosen në karantinë për shtatë ditë në shtëpi me vendim të Inspektorati Shtetëror Sanitar.
“Për qytetarët maqedonas që do të kthehen në vend pas 1 shtatorit dhe nuk kanë test PCR, ose certifikatë për vaksinim ose që e kanë kaluar KOVID-19, do të caktohet masë karantine prej 7 ditësh izolim në shtëpi me vendim të Inspektorati Shtetëror Sanitar dhe Shëndetësor”, theksohet në vendimin e seancës së sotme të qeverisë.
Gjithashtu të gjithë shtetasit e huaj që kalojnë në tranzit në Maqedoninë e Veriut do të mund ta bëjnë këtë në afat prej 5 orëve me deklaratë të nënshkruar paraprakisht në hyrje të vendit, të cilën duhet ta dorëzojnë para kontrollit kufitar në dalje nga vendi.
