Një nga viktimat e dhunës seksuale gjatë luftës në Kosovë, ka dorëzuar një padi në Prokurorinë Speciale.
Shyhrete Tahiri Sylejmani me këtë veprim ka dashur t’i japë kurajë atyre, që kanë përjetuar të njëjtën dhimbje.
Më tej ajo ka falënderuar të gjithë ata që e kanë përkrahur.
“Jam këtu të ndaj me ju dhimbjen që kam në shpirt dhe dua t’u jap kurajë atyre që vuajnë si unë. Nuk është e lehtë aspak të ndash atë dhimbje të shpirtit që thyen zemrat e s’bëhen më kurrë bashkë. Jam këtu të kërkoj drejtësinë time”, tha Sylejmani.
Ndërkohë Drejtoresha e Qendrës Kosovare për Rehabilitimin e të Mbijetuarve të Torturës (QKRMT-KRCT), Feride Rushiti, tha se asnjë person nuk është ndëshkuar deri më tani për krime lufte.
Më tej ajo ka ftuar të gjithë viktimat, që të kërkojnë drejtësi.
Kujtojmë këtu se vitin e kaluar, Vasfije Krasniqi Goodman, një tjetër viktimë përdhunimi, doli publikisht për të rrëfyer krimet ndaj saj.
Rasti i Krasniqit bëri bujë edhe në mediat ndërkombëtare.
