Artistja shqiptare me famë botërore, Dua Lipa ka dalë pak më parë në një konferencë për mediat, ku e tregoi edhe njëherë krenarinë për origjinën e saj.
Ajo nuk dha detaje të shumta nga festivali që do mbahet së shpejti, “Sunny Hill”, duke thënë se emrat e artistëve që do të marrin pjesë janë një sekret.
“Do të kemi artistë internacionale dhe të vendit, ajo është një pjesë shumë e madhe e festivalit në përgjithshmëri. Kush po vjen sivjet nuk mundem t’ju tregoj. Do ketë surpriza”, tha këngëtarja.
Krijuesja e hitit “Don’t start now” tha se është shumë e kënaqur që është në Shqipëri dhe u shpreh se do të ndihmojë shqiptarët me çdo gjë që mundet, pasi e kanë mbështetur shumë.
“Është kënaqësi që kam mundësinë të jem këtu sot dhe me “Sunny Hill Fondation” të mund të ndihmoj në çfarëdo lloj mënyre që mundemi për këtë kopsht por edhe më tej. Është një ëndërr e madhe për mua, në veçanti për një komunitet shqiptarësh. Unë mburrem shumë që kam mundësinë me qen këtu, për të ndihmuar me çdo gjë mundem sidomos për shqiptarët që më kanë suportuar shumë, kështu që më bëhet shumë qejfi të jem këtu”, u shpreh ajo.
Ndër të tjera, ylli i muzikës tha se e ka ëndërr që të ndryshojë stigmën për Kosovën dhe Shqipërinë dhe këtë punë e merr me shumë seriozitet. Ajo ka bërë me dije se dëshiron të hapi një qendër arti në Prishtinë dhe se është shumë e motivua që të punojë.
“E kam shumë ëndërr që në krejt botën të ndryshojmë stigmën për Kosovën dhe Shqipërinë që të ecim para dhe e marr me shumë seriozitet këtë punë. Me festivalin Sunny hill paratë që merreni shkojnë në festivale të ndryshme dhe bamirësi. Duam të hapim një qendër arti në Prishtinë. Kemi shumë ide dhe ëndrra dhe jemi të motivuar të punojmë, kjo nuk është gjëja e parë dhe e fundit”, tha Dua.
