Komisioneri për zgjerimin në Bashkimin Europian , Oliver Varhelyi ka komentuar vendimin e Bullgarisë për të miratuar propozimin e Macron, i cili konsiston në heqjen e vetos ndaj Maqedonisë së Veriut dhe lirimin e rrugës për hapjen e negociatave drejt BE.
“Mirëpresim vendimin ndërpartiak të parlamentit bullgar që jep mandat të qartë për miratimin e propozimit francez. Tani na duhet vendimi i BE-së për të mbajtur konferencën e parë ndërqeveritare me Maqedoninë e Veriut dhe Shqipërinë. Evropa ec përpara!” – tha Varhelyi.
Kujtojmë se Parlamenti i Bullgarisë votoi të premten për heqjen e vetos që ka bllokuar prej kohësh bisedimet e Maqedonisë së Veriut dhe Shqipërisë për anëtarësim në Bashkimin Evropian. Vendimi u miratua me 170 vota pro dhe 37 kundër në Parlamentin prej 240 anëtarësh, tha nënkryetari i këtij institucioni, Atanas Atanasov. Heqja e vetos ngjall shpresa të reja se blloku mund të vazhdojë me planet e tij për t’u zgjeruar në Ballkanin Perëndimor. Më herët para samitit u tentua ky vendim por dështoi pasi për fat të keq qeveria u rrëzua disa orë më pas dhe vendimi nuk u mor parasysh.
Më herët Kryeministri Rama ka thënë se u shpëtua fytyra e Bullgarisë dhe BE-së.
“Sapo mora një telefonatë nga Boyko Borissov. Nuk mund ta falënderoja sa duhet për mendimin e tij të mirë që më thirri, por mund ta falënderoja për rolin e tij përcaktues në heqjen e VETO-s në parlament! Mik i vërtetë, lider i vërtetë. Partia e tij GERB dhe të tjerët shpëtuan fytyrën e Bullgarisë dhe BE-së! Tani BE duhet të veprojë shpejt”
