Një banore e “Astirit” akuzoi shefin e IKMT-së se kërkon 10 mijë euro që të mos prishë shtëpitë. Ajo ka deklaruar për mediat se i kishte shkuar një sekser në shtëpi dhe i kishte kërkuar 10 mijë euro, por kërkesa nuk i ka ardhur drejtpërdrejt nga funksionari shtetëror. Gruaja theksoi se drejtori i IKMT-së së Tiranës i ka thënë se ndërtesa do të prishet pavarësisht se ajo është jashtë hartës së projektit.
Sipas saj, prishjet në këto momente janë selektive ku ata të cilët kanë paguar nuk u prishet komplet ndërtesa, por deri te matjet, ndërkohë që atyre që nuk kanë paguar u prishet e gjithë banesa pavarësisht matjeve të projektit.
“Kanë filluar prishjet prej 4 ditësh dhe IKMT-ja po ndjek dy standarde. Këto standarde janë, kush paguan do ju ngelet një pjesë e banesës nga projekti dhe kush nuk paguan do t’ju prishet komplet. Kjo gjë po ndodh po praktikisht me banesën time, unë i kam hapur rrugë projektit te vija e kuqe ku është bërë matja dhe ku është vendosur x-i dhe punonjësit e IKMT-së thonë që ajo duhet të prishet ndërkohë që ajo pjesë nuk e pengon fare projektin. Këtu po bëhen matrapazllëqe dhe pazare si te tregu i fruta perimeve. Normalisht që disa kanë paguar, mua ma sollën sekserin sot në mëngjes dhe më thanë se nëse do paguaja ai objekt s’do prishej sot. Flitet për shuma nga 10 mijë euro e sipër, këto të shohi Erion Veliaj dhe qeveria.
Personi ka qenë dje dhe më ka thënë se objekti yt do prishet, është drejtori i IKMT-së, Rigers Sheqeri, nuk e di se kush i kërkon paratë se dërgojnë sekserët e tyre. Nuk e di kush i kërkon paratë, por janë drejtorët e Erion Velisë, për këtë të hetojë prokuroria dhe SPAK.
Ti jap 10 mijë euro IKMT-së?! Unë nuk kam, më mirë le ta prishin”,- tha gruaja për mediat.
Në mesditë IKMT reagoi pas akuzave që janë bërë mëngjesin e sotëm nga banorët e Unazës së re, për prishje selektive të shtëpive të tyre, apo dhe për marrje ryshfeti që ndërtesat të mos prisheshin.
“Zonja përmendi edhe emrin e drejtorit të Tiranës në IKMT, si personi që i ka komunikuar se duhet të lirojë shtëpinë, por në lëmshin e fjalëve pa krye e pa trup, mund të aludohej kollaj siç edhe ndodhi nga mediat, se zyrtarët i paskëshin kërkuar shpërblim për mosprishjen e shtëpisë. Më poshtë keni dokumentin e sotëm të kallëzimit penal nga drejtori i Tiranës në IKMT, si dhe vendimin e Këshillit të Ministrave për prishjen e objektit që zonja pretendonte se mund të qëndronte në këmbë nëpërmjet ryshfetit”, thuhet në reagim.
