Është zbardhur dhe dosja e plotë e mashtrimit, pas arrestimeve tek Agjencia Kombëtare e Burimeve Natyrore, ku i janë shkaktuar 1.5 mln dollarë dëme buxhetit të shtetit.
Kompania Phoenix Petrolium, e biznesmenëve Naim Kasa dhe Isuf Berberi, falsifikoi firmën e kompanisë amerikane Black Swan Energy Service.
Në dosje zbardhet e-maili i Eva Pezës, CEO-s së kompanisë amerikane i dërguar në datë 17.05.2016, ministrit të Energjitikës në atë kohë, Damian Gjiknurit.
Në total ishin 8 fatura false, me vlerën totale 1.3 mln dollarë. Dy bosët e puseve janë ndihmuar nga Klodian Gradeci, drejtor i Hidrokarbureve në AKBN, i cili njihet si një njeri i afërt me ish-ministrin Damian Gjiknuri.
Në momentin, që policia zbarkoi në derën e ish-kreut të Operatorit të Sistemit të Trasmetimit, për t’i vënë prangat, konstatoi se ai ishte larguar jashtë vendit një ditë përpara, çka ka ngritur dyshime se mund të jetë sinjalizuar për urdhrin e arrestit.
(Isuf Berberi, Naim Kasa)
Nga hetimet e prokurorisë të cilat nisën pas kallëzimit të bërë nga drejtori i Albpetrol, rezulton se shoqëria “Phoenix” Petrolium me drejtues Naim Kasën dhe Isuf Berberin, e cila ka marrëveshje për shfrytëzimin e puseve të naftës me qeverinë shqiptare dhe ecuria e saj mbikëqyret nga AKBN.
Sipas kontratës, kompania kishte detyrimin për të bërë investime në puset e naftës, të cilat nuk i ka realizuar. Megjithatë, kjo kompani, ka paraqitur pranë Agjensisë tetë fatura të falsifikuara për shërbime që realisht nuk i ka përfituar nga kompania amerikane Black Swan Energy Service.
(Klodian Gradeci)
Falsiteti i këtyre faturave – thuhet në dosjen hetimore është konfirmuar nga autoritetet gjyqësore amerikane dhe vlera totale e tyre është 1.3 mln dollarë. Prokuroria ka dyshime të forta se zyrtarët e AKBN-së, ku kryesori është Klodian Gradeci, kanë certifikuar në mënyrë të kundraligjshme punimet e pakryera nga kompania, duke i shkaktuar institucionit një dëm financiar në vlerën e 1.4 mln dollarësh.
Ndërsa inspektorët tatimorë, Arben Doda e Simon Marku, të cilët ndodhen në pranga, kanë përpiluar një raport kontrolli në kundërshtim me ligjin, duke i shkaktuar institucionit një dëm ekonomik më shumë se gjysmë milioni dollarë. Ndaj biznesmenëve të “Phoenix” Petrolium, rëndojnë dyshimet për mashtrim me pasoja të rënda, fshehje e të ardhurave, për zyrtarët e agjensisë, është ngritur akuza e shpërdorimit të detyrës, ndërsa për tatimorët, ajo e moskryerjes së detyrave nga organet tatimore.
/Burimi: Neës24/GazetaReforma.com/
