Në 26-vjetorin e masakrës së Reçakut, Bashkimi Europian në Kosovë ka theksuar se drejtësia dhe përgjegjësia për krimet tronditëse në këtë fshat mbeten ende të vonuara.
Zyra e BE-së në Prishtinë ka nderuar dhe kujtuar viktimat e aktit makabër të 15 janarit 1999, kur forcat serbe vranë 45 banorë të fshatit Reçak.
Në një postim në “X”, BE shprehu solidaritet me familjet e viktimave dhe popullin e Kosovës, duke theksuar se ky krim ka lënë një plagë të pashëruar dhe se drejtësia për të ndodhur ende.
“Sot ne solidarizohemi me familjet dhe popullin e #Kosovës për të nderuar dhe kujtuar viktimat e masakrës së Reçakut, një krim i tmerrshëm që la një plagë të pashëruar 26 vite më pas. Jetët e tyre u morën brutalisht dhe drejtësia dhe përgjegjësia mbeten të vonuara”, thuhet në mesazhin e saj të përcjellë përmes platformës X.
Masakra e Reçakut ka pasur një rëndësi të madhe për zhvillimet e mëvonshme në luftën e Kosovës. Vrasjet u cilësuan nga ambasadori William Walker, drejtor i Misionit Verifikues të OSBE-së, si krim kundër njerëzimit dhe shënuan një moment kyç që çoi në intensifikimin e fushatës diplomatike për të përfunduar luftën.
Pas kësaj ngjarjeje, ndërmjetësuesit ndërkombëtarë organizuan bisedimet në Rambouillet, por pas refuzimit të Serbisë për të nënshkruar marrëveshjen, NATO nisi bombardimet që çuan në tërheqjen e forcave serbe dhe vendosjen e administratës ndërkombëtare në Kosovë.
