Në përfundim të mbledhjes së Konferencës së Kryetarëve, ministrja e Shtetit për Marrëdhëniet me Parlamentin, Elisa Spiropali, ka deklaruar se Këshilli i Ministrave dhe shumica parlamentare mbështesin plotësisht deklaratën e propozuar nga grupi parlamentar për demokraci dhe integrim. Ajo theksoi përpjekjet e qeverisë shqiptare për abrogimin e ligjit të luftës me Greqinë, duke e cilësuar atë si absurd dhe të panevojshëm.
“Qeveria shqiptare ka bërë çdo përpjekje me qeverinë greke për abrogimin e ligjit të luftës, që është një ligj absurd, krejt i panevojshëm dhe i dalë kohe. Ne e kemi bërë prezente qëndrimin tonë në të gjitha takimet me homologët tanë dhe me qeverinë greke,” tha Spiropali.
Ajo shtoi se deklarata e propozuar do të marrë mbështetjen e të gjithë parlamentit, duke theksuar marrëdhëniet miqësore mes Shqipërisë dhe Greqisë, si dhe rëndësinë e Traktatit të Paqes dhe Bashkëpunimit të nënshkruar mes dy vendeve.
Spiropali gjithashtu foli për propozimet për ndryshimet në Kodin Zgjedhor, duke theksuar se ato reflektojnë vendimet e Gjykatës Kushtetuese dhe rekomandimet e OSBE-ODIHR. Ajo bëri thirrje për bashkëpunim me opozitën dhe partitë e tjera parlamentare për të arritur një marrëveshje për një kod zgjedhor të reformuar.
“Ne besojmë që diaspora shqiptare duhet të votojë dhe këtë do ta bëjmë realitet në zgjedhjet më të afërta. Kemi reflektuar vendimin e Gjykatës Kushtetuese që e konsideron jokushtetuese mohimin e votës për diasporën dhe kemi bërë propozimet tona,” theksoi ajo.
Spiropali shprehu vullnetin e Partisë Socialiste për të dialoguar dhe për të gjetur zgjidhje të përbashkëta me opozitën dhe partitë e tjera për ndryshimet në Kodin Zgjedhor. Ajo nënvizoi se qëllimi është garantimi i rregullave të lojës dhe reflektimi i kërkesave të institucioneve ndërkombëtare.
“Është me rëndësi që Partia Demokratike të na bashkohet dhe të japë propozimet e saj. Ne do të garantojmë rregullat e lojës dhe disa rekomandime për të rafinuar Kodin Zgjedhor,” përfundoi Spiropali.
