SPAK ka dorëzuar zyrtarisht në Gjykatën e Posaçme dosjen penale të njohur si “Toyota Auris”, duke akuzuar katër persona për korrupsion, ushtrim të ndikimit të paligjshëm dhe nxjerrje të sekretit të hetimit.
Të pandehur në këtë çështje janë ish-kryeprokurori i Vlorës, Aurel Zarka, ish-oficerja e policisë gjyqësore pranë ish-Prokurorisë për Krime të Rënda, Erjona Daupaj, avokati Radovan Çela dhe Astrit Vladi. Sipas akuzave, ata kanë bashkëpunuar për të kërkuar dhe pranuar ryshfet me qëllim ndikimin tek gjyqtarë dhe prokurorë që po hetonin dosjen e 3.4 milionë eurove të bllokuara në Portin e Durrësit. Këto veprime dyshohet se kishin si qëllim favorizimin e të pandehurve në atë çështje.
Gjithashtu, SPAK i akuzon të pandehurit për përfshirje në favorizimin e Suel Çelës, me qëllim heqjen e sekuestrove mbi pasuritë e tij, në kuadër të Operacionit Forca e Ligjit. Hetimi është bazuar në të dhëna të siguruara nga komunikimet e aplikacionit Sky Ecc, të cilat autoritetet franceze i vunë në dispozicion të SPAK.
Në kuadër të hetimeve, janë marrë në pyetje një numër i madh gjyqtarësh, prokurorësh dhe personazhe të politikës, të cilët përmendeshin në komunikimet e të pandehurve. Megjithatë, ndaj këtyre personave nuk u gjetën prova të mjaftueshme për ngritjen e akuzave.
SPAK u ka dhënë avokatëve të të pandehurve një afat 10-ditor për të paraqitur kundërshtimet e tyre mbi aktakuzën. Pas këtij afati, dosja është përcjellë për gjykim. Gjykata e Posaçme pritet ta hedhë në short për të përcaktuar gjyqtarin paraprak që do ta shqyrtojë këtë çështje.
