Seanca e radhës lidhur me dosjen “Partizani” në GJKKO do të zhvillohet më 6 janar.
Gjatë seancës paraprake që u mbajt sot, Gjykata do të vendosë nëse çështja do të kalojë për shqyrtim, do të kthehet për hetime të mëtejshme në Prokurorinë Speciale, apo do të mbyllet.
Gjyqtarja Flojera Davidhi ka drejtuar seancën, ndërkohë që për këtë dosje janë të pandehur ish-Kryeministri Sali Berisha, dhëndri i tij Jamarbër Malltezi, biznesmeni Fatmir Bektashi, Xhimi Begeja dhe Andia Pustina.
SPAK ka ngritur akuzën e korrupsionit pasiv ndaj Berishës, ndërsa Malltezi akuzohet për korrupsion pasiv dhe pastrim parash. Bektashi akuzohet për korrupsion aktiv, Begeja për pastrim parash, dhe Pustina për pastrim parash.
Në të njëjtën kohë, në Apelin e GJKKO, SPAK ka apeluar vendimin e 27 nëntorit që hoqi masat e sigurisë për Berishën, duke kërkuar rikthimin e tij në masën “arrest shtëpie”.
