Pas Berishës dhe dhëndërit të tij Malltezi rradhën për tu njohur me akuzën e ka Fatmir Bektashi, ndërtuesi në atë zonë. Ai ka mbërritur në ambientet e SPAK ditën e sotme. SPAK ka mbyllur hetimet për çështjen “Partizani” ku edhe ai është hetuar për korrupsion aktiv dhe pastrim parash, por mbetet për tu parë nëse do të merret i pandehur për të njëjtat akuza apo jo.
Bektashi akuzohet nga SPAK se ka bashkëpunuar me Jamarbër Malltezin në transferimin e fitimit prej 5.4 milionë euro nga ndërtimet në ish truallin e kompleksit Partizani.
Ditën e djeshme, 11 shtator, lideri i opozitës, ish-kryeministri Sali Berisha u paraqit në SPAK.
Në mesditë kryetari i PD Berisha doli nga shtëpia e tij për herë të parë pas 8 muajsh për të shkuar në SPAK për tu njohur me akuzat. Para godinës së SPAK-ut kryetari i PD Berisha u prit nga mbështetësit dhe figurat drejtuese të PD të cilët ishin mbledhur në mbështetje të liderit të tyre e në shenjë proteste kundër SPAK-ut.
Berisha qëndroi 20 minuta në ambientet e Prokurorisë së Posaçme, ku iu komunikua akuza për korrupsion pasiv në lidhje me privatizimin e kompleksit Partizani. Më pas, rreth orës 14:00 në ambientet e SPAK-ut u prit dhe dhëndëri i tij Jamarbër Malltezi i cili akuzoi SPAK-un si një vegël në duart e Ramës.
