Kreu i Prokurorisë së Posaçme, Altin Dumani, në një komunikim me gazetarët, ka dhënë detaje mbi hetimet që po zhvillohen për kompleksin “Partizani” dhe ish-kryeministrin Sali Berisha.
Dumani ka konfirmuar se ndaj Berishës ka pasur një hetim pasuror. “Janë bërë hetimet parësore për Berishën,” tha ai, duke nënvizuar se ky hetim është pjesë e veprimeve të vazhdueshme të Prokurorisë së Posaçme për të siguruar transparencë dhe drejtësi në çështjet e rëndësishme.
Në lidhje me dosjen për kompleksin “Partizani”, Dumani theksoi se të gjitha provat janë grumbulluar dhe çështja është ende nën hetim. “Ajo që dihet është që është çështje nën hetim,” shpjegoi ai, duke shtuar se dosja do të dërgohet në gjykatë sapo të përfundojnë hetimet.
Kjo deklaratë vjen në një kohë kur ka interes të lartë publik për hetimet mbi figura të rëndësishme politike dhe projekte të mëdha infrastrukturore, duke ngritur pyetje mbi integritetin dhe transparencën e procesit hetimor në Shqipëri.
