SPAK ka hapur dosjen e shumëpërfolur “McGonigal”. Lidhur me këtë dosje është thirrur sot në dyert e SPAK ish agjenti shqiptar i inteligjencës, Agron Neza.
Sipas dosjes që SPAK ka, thuhet se në gusht të vitit 2017 McGonigal është takuar me Agron Nezën, i cili është vendosur prej vitesh në SHBA dhe me pasaportë amerikane.
Kujtojmë se ish-zyrtari i FBI-së, Charles McGonigal është shprehur se kishte marrë 225,000 dollarë nga Agron Neza, i cili sipas dokumenteve në gjykatë, u bë informatori për hetimin e FBI-së lidhur me kontaktet dhe takimet e tij në Shqipëri.
Këtë deklaratë ai e dha në gjykatën federale në Uashington, në shtator të 2023, në bazë të një marrëveshjeje mes prokurorëve dhe avokatëve të McGonigal. Ai pranoi fajësinë për një prej pikave të aktpadisë, atë për fshehjen e provave materiale, dhe prokurorët hoqën dorë nga tetë pikat e tjera.
Gjithashtu McGonigal ka pranuar se ishte takuar disa herë me kryeministrin Edi Rama duke filluar nga shtatori 2017, duke filluar nga takimi i parë më 9 shtator në prani të Duçkës që vazhdon të figurojë si personi B edhe në dokumentin ku ofrohet një akuzë e reduktuar.
