Pas zgjedhjes së Arben Krajës në krye të Porkurorsë së Posaçme, kjo strukturë ka nisur menjëherë punën.
SPAK ka dorëzuar dosjen e parë hetimore në Gjykatën Kundër Korrupsionit dhe Krimit të Organizuar (GJKKO).
Bëhet fjalë për tetë persona, të cilët akuzohen si anëtarë të një grupi kriminal që trafikonin lëndë narkotike.
Të akuzuarit janë Aranit Bida, Arben Cristea, Erando Mehmeti, Eduart Haxhi, Leonard Demiras, Gentian Rrapollari, Elvis Gjona dhe Andi Qiraxhi.
Sipas Eneid Nakuçit, prokurorit të posaçëm të SPAK, tetë të akuzuarit kanë patur role të ndara gjatë trafikimit të kanabis sativës.
Konkretisht, shtetasi Aranit Bita siguronte lëndën narkotike në Tepelenë dhe më pas organizonte transportin në aksin Tepelenë-Fier, Rrogozhinë-Elbasan, me destinacion Pogradecin.
Lënda merrej në dorëzim nga shtetasi Elvis Gjona, i quajtur Gjoni.
Gjona bënte të mundur dërgimin e hashashit drejt Greqisë në rrugë tokësore, dhe në Maqedoni me mjete lundruese nëpërmjet liqenit të Ohrit.
Aranit Bita dhe bashkëpuntorët e tij po grumbullonin sasi kanabis sativa, e cila po planifikohej të trafikohej në Turqi në shkëmbim të heroinës, që do të sillej më tej në vendin tonë për t’u trafikuar e shpërndarë tek përdoruesit.
Në dosjen hetimore gjenden edhe përgjime, ndër të tjera edhe biseda për një shtetas turk që thërritej “abi” dhe për të cilin thuhet se po e prisnin në Rinas.
Prokuroria thotë se nga përgjimet dhe vëzhgimet rezulton se Araniti ka biseduar me Lonard Demirasin ku shtojnë se do takoheshin në një pikë karburanti, ku ishte lënë peng një mjet Audi, që do shkëmbehej me një sasi droge të gjetur në Tepelenë.
Sipas prokurorisë , rezultojnë të jenë 578 kg canabis, pas peshimit të 39 thasëve me 547 paketime
Ndërkohë nga prokuroritë e rretheve gjyqësore vazhdojnë të dërgohen dosje të tjera hetimore kryesisht për çështje korrupsioni në nivele të ulta.
Dosja pritet të dorëzohet në fillim të janarit.
