Ministri i Mjedisit, Planifikimit Hapësinor dhe Infrastrukturës, Liburn Aliu, ka njoftuar dorëheqjen nga posti i tij, si pasojë e zgjedhjes së Dimal Bashës në krye të Kuvendit të Kosovës.
Përmes një postimi, Aliu bëri të ditur se vendimin ia ka dorëzuar kryeministrit Albin Kurti menjëherë pas seancës ku u votua kryetari i ri i Kuvendit.
“Të dashur qytetarë, dua t’ju njoftoj që sapo e dorëzova te Kryeministri i Republikës së Kosovës, z. Albin Kurti, letrën e dorëheqjes sime nga detyra e Ministrit në Ministrinë e Mjedisit, Planifikimit Hapësinor dhe Infrastrukturës. Dorëheqja ime vjen pas zgjedhjes së djeshme të kryetarit të Kuvendit të Republikës së Kosovës. Dje, pas votimit të kryetarit të Kuvendit, e kam njoftuar Kryeministrin Kurti për vendimin tim. Konsideroj që zgjedhja e djeshme e kryetarit të Kuvendit, institucionit më të lartë, ku vendosen ligjet dhe jep llogari qeveria, nuk është në frymën e në lartësinë e atij ideali për Republikën që ka qenë dhe mbetet arsye angazhimi për mua”, shkroi Aliu.
Zgjedhja e Dimal Bashës nga radhët e Vetëvendosjes si kryetar i Kuvendit u bë me 73 vota pro, duke i dhënë fund ngërçit disa mujor në institucionin ligjvënës, por vendimi ka sjellë edhe reagime kritike brenda partisë. Dorëheqja e Aliut konsiderohet një ndër pasojat e para politike të këtij zhvillimi.
