Qeveria është e “shqetësuar” për të gjetur sa më parë njeriun që do të zëvendësojë në detyrë ministrin tashmë të dorëhequr Sandër Lleshaj, dhe për të shuar revoltën popullore që ka nisur në vend.
Pas dorëheqjes së Lleshajt, për vrasjen e 25-vjeçarit Klodian Rasha nga një efektiv policie, dorëheqje e pranuar tashmë nga kryeministri Rama, kanë nisur dhe lëvizjet politike në radhët e socialistëve.
Kreu i qeverisë, Edi Rama, ka zhvilluar pak çaste më parë në Kryesinë e Kuvendit një takim për 1 orë me kryeparlamentarin Gramoz Ruçi, për t’u konsultuar për zgjedhjen e një emri të ri në postin ministror.
Nga sa bëhet e ditur tashmë edhe nga mediat, janë dy skenarë që janë diskutuar për mënyrën se si do të zgjidhet pasuesi i Lleshajt.
Skenari i parë është ai i zgjedhjes në këtë post të një prej deputetëve aktualë të PS-së, që ta ketë më të lehtë edhe firmosjen e dekretit nga Presidenti Meta.
Kujtojmë se dikur ka pasur problematika dhe përplasje të forta sa i përket momentit të dekretimit të Sandër Lleshajt në këtë post, apo Gent Cakajt.
Ndërsa skenari i dytë që përflitet, është ai i delegimit të pushtetit te një nga Zv.ministrat aktualë, pra që të shkojë në zgjedhje jo me një ministër të Brendshëm, por me një ndër 4 Zv.ministrat.
Lleshaj u largua dje nga posti pas shpërthimit të kaosit që ka përfshirë Tiranën, prej ekzekutimit të Klodian Rashës nga efektivi i forcave Shqiponja, Nevaldo Hadëraj.
Deri tani vendi është pa ministër të Brendshëm, ndërkohë që janë disa emra që përfliten se mund të marrin këtë post, duke nisur nga Taulant Balla apo Adnor Shameti.
Kryeministri pati edhe dje një qëndrim zyrtar për këtë çështje. Rama ka mohuar që ngjarja të lidhet me frymën drejtuese të policisë, apo me një ndikim të mundshëm politik mbi trupën policore.
Shefi i qeverisë e quajti të “pashpjegueshëm” vrasjen nga efektivi të të riut, ndërsa kërkoi ndjesë publike dhe deklaroi se vrasja është e efektivit por arma është e shtetit, e kësisoj dhe ndjesa i takon shtetit.
Kjo ngjarje ka prishur ekuilibrat e qeverisjes, duke sjellë kaos nëpër rrugët e qytetit, ku qindra të rinj kërkojnë sot pasdite largimin e drejtorit të Përgjithshëm të Policisë së Shtetit, Ardi Veliu, kërkesë kjo që sipas Ramës është e pamundur të realizohet.
/GazetaReforma.com/
