Ditën e djeshme u dëbuan nga Shqipëria dy zyrtarë iranian, pasi u shpallën të padëshiruar.
Më pas u bë me dije se ata kanë qenë të dërguarit sekret të Qassim Soleiman.
Së fundmi, të reja të tjera janë zbuluar rreth njërit prej tyre.
Ahmad Hosseini Alast, mbante detyrën e atasheut kulturor të Iranit në Shqipëri dhe kishte ardhur në Tiranë katër vite më parë.
Sipas Top Channel Hosseini Alast ishte duke punuar me Balkan Sahar, një media në shërbim të politikës së Teheranit dhe me seli në Bosnje, për të ndërtuar një televizion në gjuhën shqipe.
Këtë detyrë ai e mori më 9 Gusht të vitit 2017, kur udhëtoi për në Teheran dhe u takua me përfaqësues të MOIS(shërbimi sekret i Iranit, Forcat Quds, Zv.Drejtorin e ICRO (Organizatës së Kulturës dhe Marrëdhënieve Islamike), dhe menaxherin e rrjetit televiziv “Balkan Sahar”.
Ahmad u zhvendos në Tiranë në 2016.
Në 19 Tetor 2017 u takua me autoritete të MOIS, Forcat Quds, përfaqësues të MIU dhe Kreun e sektorit të Europës dhe Amerikës në ICRO.
Në takim, Alast, tërësisht i informuar për prezencën e MEK në Shqipëri, mori përsipër zbatimin e politikës së nevojshme për të kundërvepruar ndaj situatës.
Më parë Ahmad kishte punuar për katër vite në shërbimin e këshillimit kulturor në ambasadën iraniane në Bullgari, ku inkurajoi 18 shtetas bullgarë të udhëtonin në Qom për të bërë trainime teologjike.
Bëhet me dije se Ahmad Hosseini Alast gjatë qëndrimit në vendin tonë i ka dërguar një raport drejtorit të ICRO, ku citonte se do të performonte aktivitete të ngjashme edhe në Shqipëri.
Ai tha se do të tërhiqte njerëz të rinj nga Alavite ose Sunnitë, ose ndoshta dhe nga sekte të tjera dhe do i kthente në mjete lidhjeje midis Iranit dhe shteteve në rajon.
Mirëpo, nuk e arriti dot këtë gjë, pasi u kap në kohë nga autoritetet shqiptare.
