Në Shkodër është konfirmuar një tjetër person pozitiv me COVID-19.
Mësohet se ai është një qytetar me banim në Pukë, i cili kishte qenë i shtruar në spitalin e Shkodrës.
Pas testit me tampon ai doli negativ, por analizat me skaner në Tiranë konfirmuan se ai është i prekur.
Pas këtij lajmi, mjekët dhe infermierët që i kanë shërbyer, do të testohen gjithashtu, për të parë nëse janë infektuar apo jo.
Aktualisht numri i të prekurve ne COVID-19 në vendin tonë është 124.
Ditën e djeshme u shënua rritja më e madhe brenda 24 orësh, me 19 raste të reja.
Harta e të prekurve u zgjerua edhe me qytetet e Lezhës, Hasit dhe Beratit.
Numrin më të madh të të prekurve e mban Tirana me 72, ndërsa ndjekin më pas Fieri, Korça dhe Durrësi.
Në spitalin Infektiv ndodhen 79 persona, dy prej të cilëve në gjendje të rëndë, ndërsa pjesa tjetër janë në gjendje të stabilizuar në pavion.
Një lajm i mirë ndërkohë është shërimi i 10 pacientëve, të cilët rezultuan negativ në të dy testet e kryera.
Autoritetet vijojnë me thirrjet për respektimin e rregullave të higjienës, distancimit social dhe kufizimin e daljeve nga shtëpia.
