Nuredin Dumani ka vazhduar këtë të martë të japë dëshminë e tij në seancën e radhës të gjykatës për dosjen “Plumbi i Artë”. Gjatë seancës, ai ka shpjeguar se si ka njohur Agron Qolin dhe më pas ka pasur përplasje edhe me të akuzuarit e tjerë.
Avokati Ilia: Në ç’rrethana jeni njohur me Agron Qolin?
Dumani: E kam pasur komshi. Kemi qenë edhe miq. E njoh nga 2001-2003. Agroni në 2012 u largua në Durrës. Kemi pasur marrëdhënie shume të mira dhe hyrje-dalje familjare. Për një farë kohe unë kam punuar me Agronin në një pallat ku ai ishte teknik ndërtimi.
Avokati: Me kë punonte aty?
Dumani: Investitor ishte Enea Prifti. Unë kam punuar disa muaj aty.
Avokati: Cilat ishin marrëdhëniet mes Agron e Petrit Qolit?
Dumani: Ishin kushërinj. Petrit Qoli ishte ndërtues pallatesh, ndërsa Agroni teknik. Nuk di të kenë punuar bashkë.
Avokati: A shoqërohej Agroni me Festim Qolin?
Dumani: Po patjetër, çdo natë tek lokali i Festimit ishin.
Avokati: Kur je shoqëruar me Besnik Qolin, a ke diskutuar për marrëdhënien e tij me Agron Qolin.
Dumani: Ai fliste me respekt për të. E konsideronte njeri serioz.
Komentet e lëshuara nga të pandehurit në drejtim të tij Dumani ju përgjigj: “Nuk vdes unë. Pa ju ngrënë hallvën të gjithëve nuk ma hani mua”.
Ndërsa i pandehuri Enver Diva ju përgjigj me ton të lartë nga kafazi: Do e shohim ne se kush ja hajë hallvën njëri-tjetrit.
