Gjendja shëndetësore e të moshuarës të prekur me koronavirus në Durrës është rënduar.
Ajo ishte karantinuar në spitalin e Durrësit, ndërsa ishte bërë gati për t’u nisur në Tiranë.
Në momentin që po futej në ambulancë, mjekët e kanë kthyer mbrapsh, pasi 73-vjeçarja nuk mund të përballonte dot udhëtimin.
E moshuara erdhi nga Italia më tre mars dhe shfaqi probleme me frymëmarrjen, pasi vuante nga disa sëmundje kronike.
Ajo dyshohet se ka infektuar mjekun dhe katër infermierët që i kanë shërbyer.
Deri më tani në vendin tonë janë shënuar 12 raste me koronavirus.
Dhjetë prej të infektuarve ndodhen në Tiranë, ndërsa dy të tjerët në Lushnje dhe në Durrës.
Pacienti zero në Shqipëri është një 28-vjeçar i kthyer nga Firenze nëpërmjet pikës kufitare të Hanit të Hotit më 26 shkurt.
Për të parandaluar përhapjen e virusit, qeveria ka marrë një sërë masësh, që nga mbyllja e shkollave, e lokaleve, ofrimi i shërbimeve online, apo ndalimi i grumbullimeve dhe aktiviteteve.
Autoritetet ndërkohë vijojnë me thirrjet për qytetarët, për të minimizuar sa më shumë daljet nga shtëpia.
