Emisioni “Me Zemër të Hapur” ka trajtuar historinë e dhimbshme të një 38-vjeçareje, nënë e katër fëmijëve, e cila është përballur me dhunë të vazhdueshme nga ish-bashkëshorti i saj.
Përveç dhunës fizike dhe psikologjike që ka përjetuar, ajo tregon se edhe fëmijët i janë kundërvënë, duke e ofenduar dhe duke e përbuzur.
Gruaja tregoi se ishte njohur me ish-bashkëshortin në lagje, pasi ishin fqinj. Pas katër vitesh lidhje, ai filloi të shfaqte sjellje të dhunshme, veçanërisht nën efektin e alkoolit. Ajo rrëfeu se ishte përballur me xhelozi ekstreme dhe akuza të pabazuara, madje edhe me kërcënime për jetën e saj.
“Pasi linda djalin tonë, ai më kërcënoi me thikë, duke thënë se do të më vriste dhe do të më priste dorën. Nuk më linte as të vishesha. Ai ishte i dhunshëm jo vetëm ndaj meje, por edhe ndaj fëmijëve. Kam bërë disa denoncime, por më vonë i kam tërhequr. Pas ndarjes, u vendosa në banesat sociale në Elbasan. Kam marrë dy urdhra mbrojtjeje nga gjykata, por kujdestaria e fëmijëve i kaloi atij,” tregoi ajo.
Sipas saj, ish-bashkëshorti kishte edhe një lidhje jashtëmartesore, për të cilën ajo mori prova nëpërmjet videove ku ai shihej duke festuar me një grua tjetër në natën e ndërrimit të viteve. Ajo shtoi se nuk kishte marrëdhënie të mirë as me familjen e tij dhe se kjo kishte ndikuar në përkeqësimin e situatës.
Ajo shprehu dhimbjen për faktin se fëmijët e saj nuk komunikojnë me të dhe madje e përçmojnë, të nxitur nga ish-bashkëshorti.
“Vajza e madhe më ka pështyrë në fytyrë. Ata më përbuzin dhe përdorin një fjalor të rëndë ndaj meje,” rrëfeu ajo mes lotësh.
Nga ana tjetër, ish-bashkëshorti i saj ka mohuar akuzat, duke pretenduar se nuk ka ushtruar dhunë ndaj saj dhe se, përkundrazi, ajo ka dhunuar dhe braktisur fëmijët.
Ai gjithashtu deklaroi se shenjat e dhunës në trupin e saj nuk janë shkaktuar prej tij, por nga motrat e saj.
“Nuk është e vërtetë që unë e kam dhunuar. Ajo i ka dhunuar dhe braktisur fëmijët tonë. Edhe shenjat në trupin e saj janë sepse motrat ushtrojnë dhunë mbi të”. tha ai
